ّّ{..خ ـِـِذني على قـِـِد ع ـِـِقلي ..} ,, منقولة . - منتدى الشيخ هزاع بن سلطان بن زايد آل نهيان

Miss.Cobra · قبل3 اسبوع

السلام عليكم ورحمة الله وبركاته ,,

أحببت نقل هذه القصة ,, شخصيا أعجبتني كثيرا ,,

وهي أفضل قصة قرأتها للآن ,,,

لما له مغزى ,وفائدة ,, إن تفكرنا ,,

توجد بعض المواقف الخيالية ,, ولانستبعد ,, الواقع ,,

ّّ{..خ ـِـِذني على قـِـِد ع ـِـِقلي ..} ,, للكاتبه :ســــــراب العينMTS

أرجو من الجميع ذكر اسم الكاتبة عند النقل ,,

لحفظ الحقوق,,لما ذكر من الكاتبة شخصيا ,

إليكم بالقصة ,, و ان شاء الله تنال إعجابكم ,,(ر")

أناني يعاني · قبل3 اسبوع

مشــكوره اختي وانااول المتابعين لها

Miss.Cobra · قبل3 اسبوع

{ الج ـِـِـِـِزء الأولـِـِـِـِ }

كل ما كنت أحس بالضيق ولأن الدنيا ما تسع صدري المهموم أروح وآخذ معي هالعود للبحر

وأدندن على كيفي أشتكي ولا حتى أرقص أنا حر ماعندي حد..

المكان مكاني والأرض لي وبروحي ولا حد موجود فيها.. كأنها أرض من أراضي الخيال أرض طيبة

وزينة وخضرة وجوها بارد برودة تنعشك وتحسسك أنك عايش..أما القمر هو الشاعر اللي يرادد كل

قصيدة ومنوال والليل بمثابة الحاف اللي يغطيك..والنجوم أشبه بعيون تراقبك بكل حركة تسويها..

ورمالها كانت أحلى لحظاتي.. يوم أجلس أدق العود وأخلي الرمال الباردة تسير بين أصابع اريولي كأنها

تدور على الدفئ ..

في يوم من الأيام صار معاي موقف في الدوام خلى الدنيا تضيق بعيوني.. حسيت أني شوي وبستخف..

كانت الأيام تمر علي أشبه بالأيام اللي يعدها الجندي علشان يرجع من الحرب..

ولما انتهيت من شغلي مريت على البيت وخذت العود وقلت لأهلي أني بسهر برع البيت اليوم..

المهم وأنا متجه بالسيارة.. إلا أسمع صوت الجوال يدق.. وحطيت ايدي في مخباي وظهرته.. ورحت

أشوف منو المتصل..

لقيته صديقي غازي..

رديت عليه..

ألو...

مرااااحب بو الشباب..

مرحبتين يالغالي هلا بو نورة هلا بغازي والله.. وش الحال..؟!!

والله بخير.. بس وش بلاك يا شيخ .. منقلب حالك هاليومين ومنت عاجبني.. وش عندك..؟!!

وش أقولك يا صاحبي.. الضيق كسر ضلوعي تكسير..لو تريد الصدق يا غازي.. مليت وأنا تعبان بالحيل..

خير أن شاء الله علمني وأنا اخوك..؟!! يمكن بديني ما يسرك..؟!!

والله مدري يا الخوي..بس الحال ماعدت أطيقه .. ولا كلمة أقولها إلا ألاقيها انتشرت بين الموظفين .. لا

وياليت لاهنا وبس..

حتى الكلام اللي يالس أقوله عن هالمدير الأثول وصله .. ومن منو..؟!! ما أعرف..؟!!

تبا الصدق ياخي في شي مو طبيعي بالمرة جالس يصير معي .. حشى ولا كلمة إلا انتشرت..؟!!

قسم بالله وكأني جالس في وكالة سي أن أن ..

ههههههههه والله ضحكتني ياشيخ ..

وكالة سي أن أن مرة وحدة..؟!! جيب غيرها ياخي..

لك حق تضحك .. يا غازي.. ترى اللي إيده بالماي غير عـــ...

أدري أدري عن اللي إيديه وش ذا يقولوا عنه ..؟!! أعرفه بس ماعندك لي أختيارات...؟!!

والله ماعندك سالفة يابوك .. بصك عنك أحسن.. مالي خلقك.. مع السلامة..

أسمعني ..؟!! لا تسكر يابن فاطمة.. أنتظر وأسمع اللي بقوله..

قلتلك أقلب ويهك ياغازي.. ما عندك سالفة أعرفك أنك ماصخ..

ماصخ.. ولا مالح..؟!! هههههه

أقول.. أسكر بويهك أحسن لي..

لا.. قلـــ

فريت الجوال للكرسي اللي حذاي وبعصبية..

أقابل هالطريق ولا أسمع حسك يالغبي....

رحت أكمل طريقي إلين ما وصلت للبحر كان الوقت بدأ يهدأ
والشمس بدت تغيب..

وبدأ الليل ومع أول خيط بعثره في السما..خرجت وتمشيت بالرمال وأنا فاصخ هالنعول والغتره والطاقيه ..

وتمشيت وتمشيت رايح جاي ... وجاي رايح.. يعني على هالحالة..

إلين ما شفت الليل قد بدا سمرته وياي.. طلعت الفانوس والعود من السيارة..

وتوجهت ناحية البحر لقيت القمر والنجوم تعكس ضوها على سطحه لدرجة أني صرت نادراً ماشغل هالفانوس..

وخطيت كم خطوه إلين ما صارت المسافة بيني وبين البحر عشر خطوات..
تقريباً..

ويلست وبديت أقول موال.. وبعدها دقيت العود..

ومن أغنية لأغنية ومن موال لموال.. كان فيني طبع وأنا أغني يا أني أغمض عيوني فتره وبعدها

أفتح ولا أطالع السما وأوجه كلامي للقمر وكأني أترياه يرد علي...

والوقت كان مثل الحفرة اللي ما تشبع ياخذ وياخذ ولا يكتفي.. وكل مرة والليل يتوهني بحلاه..

وأنا بمنتصف الليل.. وقفت عن دق العود.. وأخذت أتنفس من أعماق قلبي.. أبي أطلع القهر اللي يحرق صدري..

وتحركت بعيوني وأنا أتأمل.. إلا أشوف.. شخص مب بعيد يالس عند البحر..

أشططيت غضب وما كان ناقصني حد يشاركني مملكتي..!!

قلت ما عليه ..أنا أراويه.. طبعاً ماكنت أقدر أسوي شي في البداية قلت خلاص مو مشكلة.. يمكن

هذي أول مرة وآخر مرة..يقتحم مكاني الخاص..

وتحملت وتميت يالس أراقبه بس بطريقة غير ملحوظة وتعكر مزاجي زووود عن قبل..

فوقفت على حيلي ولميت قشي ورحت للسيارة علشان أرجع البيت..

وتميت يالس في السيارة فترة.. أراقب وأراقب..هالشي..

بس ما أشوف هالآدمي يتحرك..؟!! كأنه خشبة ثابته..

ما عليه بترك لك هاليوم على مزاجي وبطوف.. لكن لو شفتك مرة ثانية شوف شو بيصير فيك..؟!!

رجعت البيت ودخلت الغرفة وطلعت لي ملابس النوم ورحت أتسبح ويوم خلصت قلت بروح أنام..

لأن هذا آخر شي يصدر من شخص كان طول اليوم هايت...

لكن أنا كنت عكس.. أول ما حطيت راسي فكري..

راح عند هالشخص اللي خرب علي صفوي وعكر نهاية يوم كان طين.. بالنسبة لي..

وإلا شوي.. أنا على بالي شوي.. ما أسمع إلا طرق باب غرفتي وإلا أمي تدش..

يا محمد..قم.. صلاة الفير ياولدي.. قم علشان تسير المسيد..

أنزين أمي.. أنا ناش أصلاً اللحين بسير..

ومثل العادة صدقتني أمي أني بروح المسيد... لكن أنا صليت في غرفتي..

بدال ماسير وأتعب هذي غرفتي عندي .. ومالي مزاج .. أسير مكان..

وساعة تجر ساعة...

إلين ما صارت الساعة ثمان.. سرت وتلبست وحبيت راس أمي وتريقت وتوجهت للدوام مباشرة..

في المكتب.. لقيت خويي غازي.. أوه يا رب ما كان ناقصني على تعب أمس إلا صباح أقابل فيه ويه

غازي.. شو هالدنيا.. اللي تعاقبني.. بس ماعليه.. أتحمل..

توجهت لمكتبي وسحبت الكرسي وجلست وعطيته ظهري وقابلت الكمبيوتر..

تكلم غازي..

بكون أحسن منك.. وعليكم السلام..

أما عني.. ولا تكلمت حتى حرف..

وشوي وجه غازي كلامه لي.. أنزين ماقلت يالطفس.. وش له سكرت التيلفون بويهي أنا رفيجك رفيج

العمر عشرة 15 سنة تسوي فيني جذيه..؟!!
ماعليه..

ماهان علي أني أزعله بس هو اللي عصبي.. بس هم بعد خلك بغيضك يا غازي أعرفك بتموت لو ماكلمتك..

محمد..ماتسمع يالأثول..أنا يالس أكلمك..؟!!

طنشته.. والله لا أخليك تتحرقص بمكانك ماكون محمد..

إلا وشوي أسمع غازي يقول.. والله بقوم من مكاني.. وأنت تعرف شو بسوي.. لو قمت؟!!

طنشت.. وسويت حركه بإيدي ..هش هش..

عصب وقام وأول ما توجه لمكتبي لف كرسيي صوبه..علشان أشوفه..

ويوم طالعت ويهه وهو أونه عاد..معصب..قال :

محمد أنا يالس أكلمك.. ليش أنت تعاملني بهالأسلوب..؟!!

تحركت بكرسيي وقلت : أنت ياغازي ما تقدر اللي أنا فيه ..؟!!

طالعني وضحك.. ليش قالوا لك كيال..؟!

شفت..هاه.. بديت تتمصخر مثل عادتك وبلا ما تسويلي حشيمة.. كأني ريال..

محمد والله إذ أنت شاك بعمرك ريال ولا لأ.. هذي مشكلتك..؟!!

لا أكلمك ولا تكلمني.. يا غازي..

خلاص خلاص.. توبة توبة.. وسحب كرسيه ويلس احذاي ..

أنزين محمد.. وين رحت البارح..؟!!

وأول ماقال هالكلمة..أووووه.. والله ذكرتني.. بالمجهول اللي أقتحم أمسيتي الخاصة.. ياليتك تسكت

شوي أريد أفكر فيه.. بس لو تكلمت وقلتله اسكت أعرفه بياكلني بقشوري.. يا حبه للسوالف..

محمد وين سرحت..؟!!

لا لا ولاشي عندك.. انزين وش كنت تقول يا غازي..؟!!

البارح.. أكلمك عن البارح وين كنت..؟!!

رحت أحوط بالسيارة.. لأني متضايق.....

صح والله!! غازي..؟!!

منو تتوقع اللي يخبر المدير واللي خلاه يكرهني واللي ينشر أخباري عند الموظفين..؟!!

باخبرك يا محمد شي ولا تعصب..

ابصراحة.. أنا شفت سالم عند المدير وأكيد هو اللي يتكلم عنك..

سالم.. ما غيره..؟!!

هيه يا محمد.. تراك غشيم.. هو يسوي هالسوالف علشان يرتفع منصبه وعلى حساب منو...؟!! حسابك يالخوي..

كنت أحاول أتمالك أعصابي لكن ماقدرت.. والله لراويه.. رحت لمكتب سالم وسويت فضيحة لا صارت ولا أستوت...

أقتحمت مكتب سالم وبعصبية.. وفريت القلم اللي كان بيدي بويهه..

أسمعني يا سالم..أسمع.. زين..

شو فيك يا أخوي..؟!!

لا تقول أخوي على لسانك.. سمعت ولا لأ..؟!!

أنت وش تريد مني.. يا ناكر الجميل..؟!!

محمد صون لسانك ترانا في الشغل مو البيت..؟!!

أعرف يا بن أمي وأبوي.. أعرف..

لكن أسمع..

ترى مثل ما تحب تفضحني عند المدير والموظفين.. أظن أن من حقي أني أفضحك يالخسيس..؟!!

من قالك هالكلام يا خوي..؟!! أنا مستحيل أسوي هالسويا يالغالي.. أنت تعرفني زين يا محمد..

بس..بس.. لا تسوي فيها متدين.. وكم مرة قلتك بلا أخوي ولا زفت ولو سمعت مرة ثانية شي انتشر

عني .. والله والله ماتلوم إلا نفسك.. يا.. سالم.. سمعت..ما تلوم إلا نفسك..

ماتلووووووم إلا نفسك..

وطالعته من فوق لتحت.. بنظرة احتقار..ورحت..

وتوجهت لمكتبي.. بعد ماتركت أخوي سالم منصدم مني..

بس المهم حسيت أن النار اللي في صدري

شوي هدت... لحقني غازي..للمكتب..

أحسن يستاهل الخسيس.. ياخي أتمنى أنه..يفارقنا بلا عودة..

الله يسمع منك يا غازي..

معرف كيف تتحمل غلاسته يا شيخ..!!!

ماعليه حذرته وأن شاء الله يفهما عاد.. ياخي لو وقفت عند المدير بقول ممكن..

لكن حتى عن المكافئة اللي نزلها لي المدير بدون علم الموظفين.. هذي بكوم.. يالله عالحقد..

قلتلك أخوك يحب نفسه.. بس ما صدقتني..

ماعليه يا غازي خلنا نخلص هاليوم .. على خير.. لو بقى خير أصلاً..

ساعات وساعات إلا انتهى موعد الشغل وكل منا توجهه لبيته..

أول ما وصلت البيت.. سلمت على أمي وأبوي وأخواني وأخواتي..

ودشيت الغرفة توضيت وصليت ورحت آكل كم لقمة علشان تصلب طولي..

وبعدها رجعت للغرفة علشان آخذ قيلولة..

سمعت أحد يدق عالباب..

منو ..؟!

أنا سالم.. ممكن أدش يا محمد..؟!!

لأ..

بس شوي ما بطول عليك..

قلت لأ.. ماتفهم..؟!!

صدقني ما باخذ من وقت كثير.. أرجوك علشاني..

توجهت للباب وفتحته.. فتحة بسيطة وطليت منها براسي بس..

هاه.. شو ..؟!!

ممكن أدش..؟!!

ليش ناوي تبيت عندي..؟!!

لا.. يا أخوي بس..أبكلمك بموضوع وما أريد حد يسمعه من الأهل..

أشوف ظهر لك راس بعد.. ياي تبا تتكلم عن فضيحتك..؟!!

محمد لو سمحت ممكن أدش..؟!! الله يخليك خليني أدش وبعدها.. أنت حر..

سكت شوي وبعدها طلعت راسي وفتحت الباب أكثر.. دش سالم الغرفة.. وصك الباب من وراه بالمفتاح..

وقال بصوت متروس من الغضب.. والحره..

وأشرلي بالسبابة..

أنا ما ريد أتكلم معاك عن الحركة السخيفة اللي صارت اليوم..

لكن اللي أريد أقوله الشخص اللي خبرك هالكلام اللي قلته على مسمع

الموظفين هو شخص سافل..

هجمت عليه ومسكته من حلجه.. أسمعني زين يالكلب..

ترى السافل أنت.. يالخسيس..مو اللي ياي يفضحك عندي..

ولا اللي زعلك انه سوى نفس حركتك بالدس..

انصدم مني سالم لأنها أول مرة يشوفني على هالحالة ولأول مرة كمان..

أمد إيدي على اخوي اللي يكبرني.. وأكلمه بطريقة عيال الشوارع..

طالعني.. بنظرة كلها متفاجئة.. وكأنه يسحب الكلمة..

أنا....أنا.. كلب يا محمد..؟!!

نعم.. وخسيس.. ويارب تموت وتفارقني.. ياخي غثيتني وياك.. تعبت معاك حييل ..

انسى أن عندك أخ.. وخليني أعيش حياتي.. بسك عااااد..

خرجت دمعة من عين أخوي وهو يقول.. ماعليه.. الله يسامحك..

أنا آسف لأني طولت عليك بس ممكن تهد ايدك وتترك حلجي....!!

هديت حلجه وأنا كنت أتمنى أني أقتله.... وقلت بصوت ساخر..

زين والله لو بتفارقني اللحين..وللأبد..

خرج أخوي وهو منصدم بالحركة اللي أنا بنفسي معرف كيف سويتها..

ولما توجه للباب.. طالعني وقال : تعرف يا محمد مردك تعرف منو منا الخسيس..أنا... ولا غازي...؟!!

وعقبها خرج.. وعطاني ظهره.. وراح.. بخيبة أمل..

**********************************************

,,, تـــرقـــبــــوا الج ـِـِزء الــثــاني ,,,>-----------

أي تعليق أو نقاش ,,, مسموح به ,,^^

*ميت H بحبك* · قبل3 اسبوع

تسلمين ختيه ع القصه

نترقب البارت الثاني

حليله والله غمضنــي سالم وليييييييييش جيه اخووه محمد ع طوول يصدق اي رمسه ؟؟

رفة هدب · قبل3 اسبوع

تسلمين عالقصه

ونتريا البارتات الباقيه

^^

درع الـ ع ــين · قبل3 اسبوع

مشكووره اختي على النقل قصه جميله
ويعطيج العاافيه

آلملتـآعهـ ..]× · قبل3 اسبوع

.

من المتابعيـنَ . .

تسلميـنَ . .

الشاطرة · قبل3 اسبوع

بتابعها
ننترقبش
تسلمين

وحداوي7 · قبل3 اسبوع

تسلم ايدج خيتوو و انا الحين بظهر
و يوم برد بقراها
لي عوووده

+هاجس الليل+ · قبل3 اسبوع

تسلمين ع القصه الحلوه

يعطيج العافيه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)